Umukinnyi wa Rayon Sports akomeje gushinja bagenzi be kumureba ay’ingwe bagamije kumwirukanisha

Rutahizamu Mpuzamahanga ukomoka mu gihugu cya Mali, Boubacar Traore akomeje gushinja bagenzi be kutamuha imipira ngo atsinde ibitego bagamije kumwirukanisha.

Muri Kanama 2022, nibwo Boubacar Traore yageze mu ikipe ya Rayon Sports ayisinyira amasezerano y’umwaka umwe, bikaba bivugwa ko yaguzwe miliyoni 12 z’Amanyarwanda akaba anahembwa miliyoni buri kwezi.

Uyu rutahizamu ni we mukinnyi wa kabiri uhembwa amafaranga menshi muri Rayon Sports inyuma ya Heritier Luvumbu Nzinga ugiye kujya ahembwa miliyoni n’igice, mu gihe kandi na Essomba Leandre Willy Onana na Paul Were Ooko na bo bahembwa miliyoni y’Amanyarwanda.

Kuri Boubacar Traore we avuga ko impamvu ikomeye ituma adatanga umusaruro ushimishije ari uko bagenzi be batamuha imipira nk’uko abandi ba rutahizamu bayibaha, uyu mukinnyi kandi ashinja bagenzi be kutamugaragariza ubumwe iyo bari mu myitozo ndetse no mu rwambariro.

Boubacar Traore asigaraniye amasezerano y’amezi atandatu mu ikipe ya Rayon Sports, ni we mukinnyi wahombeye iyi kipe muri uyu mwaka w’imikino kuko nta gitego yari yatsinda cyangwa ngo atange umupira wavuyemo igitego, ikintu gikomeye yakoreye iyi kipe ni uko yakoreweho penaliti ikinjizwa neza na Essomba Onana ku mukino wa shampiyona batsinzemo Gorilla FC igitego kimwe ku busa.