Social Mula
Rutahizamu Mpuzamahanga ukomoka mu gihugu cya Cameroon, Essomba Leandre Willy Onana yabwiye umutoza Haringingo Francis Christian ko atiteguye kubanza mu kibuga ku mukino bazahuramo na Musanze FC ku munsi wa 16 wa shampiyona y’Icyiciro cya Mbere umwaka w’imikino wa 2022-2023.
Ku Cyumweru tariki 22 Mutarama 2023, kuri Stade ya Muhanga ikipe ya Rayon Sports izahakirira Musanze FC, umukino ubanza wahuje aya makipe yombi muri shampiyona ikipe ya Musanze FC yatsinze Rayon Sports ibitego bibiri ku busa.
Mu ikipe ya Rayon Sports bugarijwe n’imvune aho abarimo Rwatubyaye Abdul, Ndizeye Samuel, Raphael Osaluwe Olise, Tuyisenge Arsene na Mbirizi Eric bari hanze y’ikibuga kubera imvune.
Kuri rutahizamu Essomba Leandre Willy Onana na we yabwiye umutoza Haringingo Francis Christian ko atazaba yiteguye guhita abanza mu kibuga ku buryo yatanga umusaruro ushimishije, amahirwe menshi akaba ari uko azatangira kubanza mu kibuga ku mukino uzakurikira uwa Musanze FC.
Rayon Sports yasoje imikino ibanza ya shampiyona iri ku mwanya gatanu n’amanota 28. Ni inyuma ya AS Kigali ya mbere n’amanota 30, inganya na Kiyovu Sports ndetse na APR FC na Gasogi United zifite amanota 28 mu mikino 15 zakinnye.
Burya rero umuntu agira uko yiyumva, niba Onana yumva atari tayari mu kubanza mu kibuga ni ukuri ni ubutwari yagize bwo kubasha kubisohora akabivuga. Byatera imbogamizi n’impungenge abantu akinnye ntagire umusaruro atanga abanje mo kandi ariwe ikipe iteze ho umusaruro. ku bwanjye ndamushimye.