Umukinnyi Feisal Salum yahawe umuzinga w’imodoka n’inzu ihenze

Umukinnyi wo hagati mu gihugu cya Tanzania Feisal Salum Abdalla yongeye kugaragara mu mwambaro w’umutuku uranga ikipe ya JKU yo muri Zanzibar ,bikaba bivugwa ko amaze iminsi anagaragara arikugendara mu modoka yo mu bwoko bwa Ranger Rover bishoboka ko yahawe n’iyi kipe.

Feisal Salum Abdalla bakunze gutazira akazina ka Fei toto,aherutse kugaragara mu mukino wabaye kuwa kane w’icyumweru gishize wari wahuje ikipe ya JKU yahoze akinira akaza kuyivamo mu mwaka wa 2018 n’ikipe ya Mlandege bitungura benshi.

Muri uyu mukino wabereye Mao Zedong Stadium Fei yakinnye iminota 45 y’igice cya kabiri cy’umukino ,anabasha gutsindira iyi kipe igitego 1 mu gihe yanafashije gutsinda ibindi bitego 2 muri 4 JKU yatsinzemo  Mlandege Fc.

Nyuma y’umukino ibinyamakuru mu gihugu cya Tanzania byagerageje kumuvugisha ngo bimubaze niba yasubiye muri JKU ariko araruca ararumira avuga ko igihe nikigera azagira icyo atangariza itangazamakuru.

Fei yatandukanye na JKU Fc mu mwaka wa 2018 ,ahita yerekeza muri Yanga ,hakaba hari kwibazwa niba uyu musore akomereza muri JKU ,cyane ko bivugwa ko iy’ikipe yaba yaramuhaye  imodoka n’inzu .