Umugore n’umwana we batawe muri yombi bakekwaho ubwicanyi

Umugore wo mu karere ka Gisagara arakekwaho kwica umugabo we afatanyije n’umwana wabo w’umukobwa.

Byabereye mu mudugudu wa Ryabamenangiga, mu kagari ka Rwamiko, mu murenge wa Muganza mu karere ka Gisagara.

Nyakwigendera yitwaga Nsabimana Jean Baptiste bikekwa ko yishwe n’umugore we ubwo yari atashye ubwo nyakwigendera yahanuraga umwana we w’umukobwa aho bari bicaye mu ruganiriro.

Umugore ngo yaje kuva mu cyumba, aramubwira ngo “uramuhanura nawe utihanuye”, Bikimara kuba batangiye kurwana, umwana w’umukobwa afasha nyina maze umugore akubita igiti umugabo ahagana ku ijisho ry’ibumuso.

Umunyamabanga Nshingwabikorwa w’umurenge wa Muganza, Kayinamura Jean Baptiste yavuze ko uriya muryango wari usanzwe ufitanye amakimbirane. Ati “Nyakwigendera yaje gusohoka ahungira ku mubaturanyi ari naho yaguye.”

Yakomeje agira Ati “Bapfuye amakimbirane ashingiye ku igare umugabo yagurishije batabigiyemo inama.”

Umurambo wajyanwe ku bitaro bya Kibirizi kugira ngo usuzumwe. Naho umugore n’umwana we batabwa muri yombi.