Umugabo yishe umugore we bapfa ibiryo by’igisibo cya Ramadan 

Ku wa 1 Werurwe 2025, mu gace ka Fadamam Mada, hafi y’Ishuri Rikuru ry’Abakobwa muri Leta ya Bauchi, habaye amahano. Umugabo w’imyaka 50, Alhaji Nuru Isah, yishe umugore we wa kabiri, Wasila Abdullahi w’imyaka 24, nyuma y’impaka zavutse bapfa ibiryo byo gutegura ifunguro rya Ramadan. Nk’uko Polisi yabitangaje, uyu mugabo yasaga n’uwarakaye cyane kubera ibikoresho byo gutegura ifunguro byari byabuze, bigatuma impaka zikara.

Muri ayo makimbirane, Isah yafashe inkoni atangira gukubita umugore we bikomeye, kugeza ubwo ataye ubwenge. Abaturanyi bamujyanye kwa muganga mu bitaro bya ATBU Teaching Hospital, ariko abaganga batangaza ko yamaze gushiramo umwuka. Polisi yahise ifata uyu mugabo, ndetse n’inkoni yakoresheje nk’ikimenyetso mu iperereza.

Komiseri wa Polisi ya Bauchi, CP Auwal Musa Muhammad, yavuze ko ubutabera bugomba gukorwa, yibutsa ko ihohoterwa ryo mu muryango ari icyaha gikomeye. Yasabye abaturage gutanga amakuru ku ihohoterwa nk’iri kugira ngo hatabaho ibindi byaha nk’iki. Polisi irasaba abantu gukemura amakimbirane mu mahoro no kubahana kugira ngo hagire igihinduka mu miryango.