Umubyinnyi Titi Brown kuri ubu ufunzwe ari gutabaza asaba inkunga y’amafaranga 

Ishimwe Thierry uzwi nka Titi Brown ari gusaba inkunga izamufasha mu rubanza afite rw’ubujurire ku kirego akurikiranyweho cyo gusambanya umwana.

Urubanza rwa Titi Brown rwari kuba ku itariki 30 Ugushyingo 2022 mu Rukiko Rwisumbuye rwa Nyarugenge, rurasubikwa rushyirwa ku itariki 8 Gashyantare 2023.

Ku makuru atangwa na mushiki w’uyu musore, avuga ko ari gusaba inkunga y’amafaranga miliyoni 1.5Frw yo kwishyura umuburanira mu mategeko kuzamufasha mu kujurira ku byaha aregwa.

Titi Brown ashinjwa gusambanya umwana w’umukobwa w’imyaka 17, ku cyaha bivugwa ko yakoze tariki 14 Kanama 2021.

Titi Brown mu rubanza ajurira ahakana iki cyaha, gusa akemera ko uyu mukobwa yaje kumureba bagahura ariko ntiyegeze yinjira mu nzu iwe.