Umubare w’amafaranga yinjiye ku mukino wa AS Kigali na Sunrise FC watumye abakunzi b’umupira w’amaguru baha urw’amenyo aya makipe

Umukino w’umunsi wa 20 wa shampiyona y’Icyiciro cya Mbere mu Rwanda wahuje ikipe ya AS Kigali na Sunrise FC, ikipe ya AS Kigali yari yakiriye umukino yinjije ibihumbi 67 by’Amanyarwanda gusa yatanzwe n’abafana barebye uyu mukino.

AS Kigali yanganyije na Sunrise FC 2-2 mu mukino w’umunsi wa 20 wa shampiyona ihita ifata umwanya wa mbere.

AS Kigali yari yakiriye Sunrise FC yaherukaga guhagarika umutoza Seninga Innocent, yari ifite icyizere ko ishobora kuza kuyitsinda byoroshye.

Yatangiye neza itsinda igitego cya mbere ku munota wa 6 gusa w’umukino cyatsinzwe na Rukundo Denis.

Mbere y’uko igice cya mbere kirangira, ku munota wa 44, Babuwa Samson yaje kwishyurira ikipe maze bajya kuruhuka ari 1-1.

Shabani Hussein Tchabalala yaje gutsindira AS Kigali igitego cya kabiri ku munota wa 61, Nyamurangwa Moses yaje kongera kwishyurira Sunrise FC ku munota wa 84. Umukino warangiye ari 2-2.

AS Kigali yahise ifata umwanya wa mbere n’amanota 37 inganya na APR FC ya kabiri ariko ikaba itarakina umunsi wa 20.