Uganda Premier League : URA FC yatsinze Lugazi FC mu mukino ukomeye, Maroons nayo itsinda Police FC

Ikipe ya URA FC yakomeje kuzamuka mu mikino ya Shampiyona ya StarTimes Uganda Premier League nyuma yo gutsinda Lugazi FC igitego 1-0 ku kibuga cya Nakivubo ku munsi wa 13 wa shampiyona ya Uganda.

Igitego rukumbi cyatsinzwe na Ivan Ahimbisibwe ku munota wa 23, nyuma y’akazi gakomeye ka Joseph Ssemujju, wanyuze ku bakinnyi batatu abacenga akabona uko aha umupira  Ahimbisibwe.

Uyu rutahizamu yahise atera ishoti rikomeye ryo hasi, rikaba ryahise ritsinda umuzamu wa Lugazi, Fahad Emuran.

Iyi ntsinzi yashyize URA FC ku mwanya wa kane n’amanota 21 mu mikino 13, ikaba isigaye irushwa amanota atandatu na NEC iri ku mwanya wa mbere n’amanota 27. Lugazi FC, yahagaritswe ku rugendo rw’imikino umunani idatsindwa, iri ku mwanya wa 12 n’amanota 13, irusha amanota ane gusa amakipe ari mu murongo utukura.

Mu wundi mukino wabereye i Kavumba, Maroons FC yatsinze Police FC 2-1.

Police FC yafunguye amazamu ku munota wa gatandatu binyuze kuri Isaac Ogwang, ariko Ivan Asaba aza gutsinda ibitego bibiri ku munota wa 24 kuri penaliti n’uwa 54.

Iyi ntsinzi yahise izamura Maroons ku mwanya wa gatandatu n’amanota 19, naho Police FC ijya  ku mwanya wa karindwi n’amanota 17.