HARAGIRIMANA Dieudonne
Kuri uyu wa gatandatu tariki 21 Mutarama 2023 , nibwo Nkurikiyinka Charles uzwi nk’Umukonyine muri filime Umuturanyi itunganywa ikanayoborwa na Clapton Kibonke yarushinze na Kayirangwa Josiane.
Ni ibirori byabanjirijwe n’imihango yo gusaba no gukwa yabereye muri Hope garden Kicukiro Niboyi ku isaha ya saa tatu z’igitondo , nyuma hakurikiraho umuhango wo gusezerana imbere y’Imana wabereye mu rusengero rwa Miracle Center Church Kabeza , nyuma hakurikiraho kwakira abatumiwe nabyo byabereye ku Kicukiro.
Ni ubukwe bwitabiriwe n’ibyamamare bitandukanye byiganjemo abakinnyi bo muri filime Umuturanyi , ndetse n’abandi banyarwenya batandukanye , barimo Fally Merci , Seth wo muri Zuby Comedy , Miss Nyambo ,Rusine n’abandi batandukanye.
Ni umuhango Charles yatunguranye ararira cyane ubwo yarimo ahobera umubyeyi we ,igihe umukazana we yari agiye kumuha impano yari yamuteguriye.
