Kubwayo Mc croix
Ku wa Gatatu, tariki ya 21 Kanama 2024, ikipe y’igihugu y’u Rwanda ya Basketball y’abari n’abategarugori yakoze amateka, itsinda ikipe y’igihugu ya Argentine mu mukino w’ishiraniro. Uyu mukino wabereye muri BK Arena mu irushanwa ry’ibanze ryo gushaka itike yo gukina ijonjora ryo gushaka itike yo gukina imikino y’igikombe cy’isi cya Basketball.
Umukino watangiye ku isaha ya saa mbiri z’ijoro, aho abakinnyi b’u Rwanda berekanye ko bafite ubushake n’imbaraga zo kugera ku ntsinzi.
Kuva ku gace ka mbere kugeza umukino urangiye, u Rwanda rwabaye ku isonga, rukoresha abakinnyi bafite impano idasanzwe, barimo Bella Murekatete, umaze kuba icyamamare mu bakunzi ba Basketball mu Rwanda. Uyu mukinnyi yatsinze amanota 18 muri uyu mukino, yunganira cyane intsinzi y’u Rwanda, nyuma yo no kwigaragaza atsinda amanota 24 mu mukino uheruka batsinzemo ikipe y’igihugu ya Lebanon.
Agace ka mbere karangiye u Rwanda ruyoboye, bikomeza gutyo kugeza umukino urangiye ari amanota 61 kuri 38 ya Argentine.
Umukino wabaye witabiriwe na Perezida wa Repubulika y’u Rwanda, Paul Kagame, hamwe na Madamu we Jeanette Kagame, bakaba bishimiye cyane intsinzi.
Iyi ntsinzi ya kabiri yikurikiranya nyuma yo gutsinda Lebanon, irashimangira ko ikipe y’igihugu y’u Rwanda yiteguye neza, ndetse itanga icyizere cyo kwitwara neza mu mikino iri imbere. Umukino ukurikiyeho, u Rwanda ruzahura n’ikipe y’ubwami bw’abongereza, Great Britain, ku wa Kane tariki ya 22 Kanama 2024.
