M.Ben
Ingabire Diane ukinira Ikipe y’Igihugu y’u Rwanda yo gusiganwa ku magare, yegukanye Isiganwa Mpuzamahanga ry’Amagare mu Bagore “Tour Cycliste Féminin International du Burundi” ryabaga ku nshuro ya gatatu.
Iri rushanwa ryari rimaze icyumweru rizenguruka igihugu cy’u Burundi, ryihariwe n’Abanyarwanda cyane kuva ritangiye kugeza rirangiye.
Agace ka nyuma kazengurukaga umujyi wa Bujumbura, aho abakinnyi baciye ahazwi nko kwa Ndadaye, Hotel Source du Lac Tanganyika, Cercle Hippique ndetse no kuri Asiatique. Utu duce batuzengurutse inshuro 30 zingana n’ibilometero 75.
Aka gace karangiye Ingabire Diane yegukanye umwanya wa mbere, Nirere Xaveline aza ku wa kabiri, Zayed Ahmed ukomoka mu Misiri aza ku mwanya wa gatatu. Nzayisenga Valentine yaje ku mwanya wa kane, mu gihe Ndayishimiye Violette yabaye uwa gatanu.
Ku rutonde rusange, Ingabire Diane yabaye uwa mbere akoresheje amasaha 7 iminota 55 n’amasegonda 30, Mukashema Josiane yabaye uwa kabiri arushwa amasegonda 13 n’uwa mbere, Nirere Xaveline aza ku mwanya wa gatatu arushwa umunota n’amasegonda 17.
