Shyorongi habereye impanuka iteye ubwoba aho umushoferi wari utwaye ikamyo ipakiye inka yaje gusinzira birangira ibarengeje umuhanda – AMAFOTO

Mu muhanda uva Rulindo ugana Kigali habereye impanuka y’ikamyo yari itwaye inka yarenze umuhanda ingonga ipoto y’amashanyarazi.

Iyi kamyo yavaga Rulindo itwaye inka 11 izijyanye ku ibagiro riri Nyabugogo, yageze Shyorongi irenze gato ku biro by’umurenge wa Kanyinya umushoferi wari ufite umunaniro yaje gusinzira maze akanguka imodoka yamaze kurenga umuhanda.

Abandi bantu 2 bari kumwe n’umushofiri batangarije TV1 dukesha iyi nkuru ko umushoferi yaje ananiwe ku buryo bahoraga bamukangura ashaka gusinzira.

Ikimara kurenga umuhanda yagonze ipoto y’amashanyarazi, inka 3 zirangirika zimwe zicika amaguru gusa umushoferi we yavuyemo yanegekaye gusa akivamo yahise acunga abantu ku maso ahita atega indi modoka arigendera.

Umuvugizi wa Police ishami rishinzwe umutekano wo mu muhanda, SSP Irere Rene  yemeje aya makuru avuga ko uyu mushoferi agishakishwa kugira ngo hakorwe iperereza ku cyaba cyateye impanuka gusa avuga ko bikekwa ko ari umunaniro.