Rwanda: umwarimu yishe mugenzi we amukubise icupa

Mu karere ka Nyaruguru haravugwa inkuru ibabaje y’umwarimu wishe mugenzi we amukubise icupa ubwo bari mu kabari basangira inzoga.

Ibi byabereye mu kabari kari mu isantere yo mu Iviro mu Kagari ka Nyagisozi mu Murenge wa Nyagisozi ku mugoroba wo kuri uyu wa Gatatu ahagana saa Moya tariki ya 12 Ukwakira 2022.

Amakuru avuga ko abo barimu bombi bari bavuye ku kazi bajya gusangira inzoga mu kabari baza gushyamirana.

Bari mu kabari ngo bagiye impaka baza kurwana maze uwitwa Ndabakuranye Bonaventure akubitwa icupa mu mutwe na mugenzi we arakomereka cyane.

Akimara gukomereka yahise ajyanwa kwa muganga ku bitaro ya CHUB ngo avurwe ariko bigeze nijoro ahita yitaba Imana.