Rutsiro FC yategeye umurengera w’amafaranga umuzamu wayo naramuka asoje umukino atinjijwe igitego na Rayon Sports

Ubuyozozi bw’ikipe ya Rutsiro FC bwategeye abakinnyi agahimbazamusyi kangana n’ibihumbi 200 by’Amanyarwanda nibaramuka batsinze Rayon Sports.

Ku wa Gatandatu tariki 25 Gashyantare 2023, ikipe ya Rutsiro FC izakira Rayon Sports mu mukino w’umunsi wa 21 wa shampiyona y’Icyiciro cya Mbere umwaka w’imikino wa 2022-2023.

Amakuru dukesha umwe mu bari hafi ya Rutsiro FC ni uko abakinnyi nibatsinda Rayon Sports bazahabwa ibihumbi 200, ni nako umuzamu Dukuzeyezu Pascal nasoza umukino atinjijwe igitego na Rayon Sports azahabwa ibihumbi 100 by’Amanyarwanda.

Rayon Sports yahagurutse i Musanze yerekeza i Rubavu mu gitondo cyo ku wa Gatanu, iraza gukora imyitozo ya nyuma kuri Stade Umuganda nyuma y’umukino wa Etincelles FC na AS Kigali. Izacakirana na Rutsiro FC bucyeye ku wa Gatandatu tariki 25 Gashyantare 2023.

Nyuma y’uyu mukino ku Cyumweru tariki 26 Gashyantare, abafana ba Rayon Sports bazagaruka i Musanze gushyigikira Musanze FC ngo izabatsindire umukeba APR FC kuri Stade Ubworoherane nk’uko byatangajwe n’Umuvugizi wa Gikundiro, Nkurunziza Jean Paul.

Ku rutonde rwa shampiyona, Rayon Sports iri ku mwanya wa kabiri n’amanota 39 aho irushwa na mukeba APR FC ya mbere inota rimwe, mu gihe Rutsiro FC yo iri ku mwanya wa 14 n’amanota 18.