Rutahizamu wa Kiyovu Sports yiyemereye ko umusifuzi yabahaye penariti itariyo

Rutahizamu wa Kiyovu Sports n’ikipe y’igihugu ya Amavubi , Muhozi Fred yiyemereye ko ikipe ye yahawe penariti itariyo.

Ku gicamunsi cy’ejo hashize ikipe ya Kiyovu Sports yakinaga na Le Jeunesse mu mukino ubanza wa ⅛ mu Gikombe cy’Amahoro.

Muri uwo mukino wari wabereye kuri sitade Umumena ukarangira Kiyovu Sports itsinze ibitego bitatu kuri bibiri, bitsinzwe na Muhozi Fred na Iradukunda Bertrand. Mu bitego bitatu bya Kiyovu Sports harimo penaliti bahawe ubwo umukinnyi wa La Jeunesse yategaga Muhozi Fred, nyuma y’uwo mukino bamwe bakomoje kuri iyo penaliti bavuga ko Muhozi yatezwe ataragera mu rubuga rw’amahina.

Umwe mubabajije Muhozi Fred niba koko penatiti yatanzwe yariyo ni Jean Luc Imfurayacu, umunyamakuru w’imikino kuri Radiyo ya B&B FM Umwezi.

Jean Luc yagiye ku rubuga rwe rwa Instagram ashyiraho Videwo igaragaza iryo kosa ryavuyemo penaliti maze abaza abantu niba koko yari penaliti, by’u mwihariko yabajije Muhozi Fred , maze nawe atariye indimi yemeza ko umusifuzi yibeshye.
Muhozi Fred yaraje asubiza Jean Luc ati ‘Hoya ‘ arenzaho akamenyetso gaseka.