Social Mula
Rutahizamu wa Singida Big Stars FC n’Ikipe y’Igihugu y’u Rwanda ‘Amavubi’, Meddie Kagere yashimangiye ko Rayon Sports na APR FC zose azikunda ariko akaba nta n’imwe afana.
Uyu rutahizamu yabitangaje mu kiganiro yagiranye na Radio 10 mu kiganiro Urukiko rw’Imikino, akaba yavuze ko buri kipe afite icyo ayikundira.
Yagize ati “Yaba Rayon Sports ndayikunda kuko narayikiniye, na APR FC ndayikunda kuko mba mbona ibintu by’abasirikare biri ku murongo, rero zose ndazikunda ariko nta n’imwe mfana kuko mfana ikipe mba ndi gukinira”.
Meddie Kagere yerekeje muri Singida Big Stars nyuma yuko yari asoje amasezerano y’imyaka ibiri yari yarongeye mu mwaka wa 2020 mu ikipe ya Simba SC. Nubwo yari yasoje amasezerano ariko ikipe ya Simba SC yari yaramujyanye mu rugendo iri gukorera mu gihugu cya Misiri yitegura umwaka w’imikino wa 2022-2023.
Meddie Kagere waje gukina mu Rwanda mu mwaka wa 2006 aje mu ikipe ya Atrco FC akanakinira amakipe atandukanye hano mu Rwanda, yagiye gukina hanze y’u Rwanda avuye muri Rayon Sports agiye muri Albania mu ikipe ya FK Firana.
Muri Albania Meddie Kagere yahakinnye umwaka umwe maze ahava agiye muri Gormahia yabayemo hagati ya 2015-2018 maze ahava ajya muri Simba SC mu 2018 aho byavuzwe ko yamutanze ibihumbi 55 by’amadolari imuhanganiye Young SC.
Amasezerano y’imyaka 2 yasinyiye Simba SC yarangiye mu mwaka wa 2020 maze yongera andi y’imyaka ibiri ari nayo yarangiranye n’umwaka w’imikino wa 2021-2022.
