THIERRY Mugiraneza
Umunyabwigwi wa Manchester United, Rio Ferdinand yakije umuriro ubwo yagereranyaga Casemiro na Thomas Partey mbere ya Derby ‘ izahuza Manchester United na Arsenal ku cyumweru.
Ku cyumweru hategerejwe umukino karahabutaka uzahuza Manchester United na Arsenal ukazabera kuri Emirates Stadium sitade y’ikipe ya Arsenal. Mbere y’uko umunsi nyirizina ugera w’umukino impaka ni zose hagati y’abasesenguzi n’abafana ba makipe yombi, kimwe mu bintu biri kugaruka cyane mu mpaka mbere y’uyu mukino ni ukwibaza ngo mu kibuga hagati haya makipe yombi n’iyihe ityaye kurusha indi?.
Rio Ferdinand wakiniye Manchester United ubwo yari mu kiganiro kitwa Five Podcast yabajijwe Umuntu abona uri hejuru hagati ya Casemiro wa Manchester United ndetse na Thomas Partey wa Arsenal, maze Rio utajya urya indimi yemeza ko kuri we asanga umunya-Brazil Casemiro arihejuru cyane ya Thomas Partey.
Rio Ferdinand yagize ati ” Thomas Partey ntabwo ari mwiza bihagije mu gukora ibyo Casemiro akora. Sintekereza ko hari ingaruka azagira mu kugarira Manchester United”.
Nubwo benshi bateye imijugujugu Rio Ferdinand ariko imibare yo igaragaza ko Casemiro w’imyaka 30 y’amavuko kuva yagera muri Manchester United avuye muri Real Madrid, amaze gutanga imipira 5 ivamo ibitego ndetse atsinda ibitego 2 mu mikino 27 akiniye amashitani atukura, Casemiro amaze kurema amahiwe 14 ndetse akuraho abantu umupira inshuro 46 ( tackles) n’aho Thomas Partey ukinira abarashi amaze gutsindira Arsenal ibitego 2, arema uburyo 13 mu gihe yakoze tackles 34.
Amagambo akomeje kuba menshi hibazwa ikipe izatsinda uyu mukino uzaba ku cyumweru dore ko amakipe yombi ameze neza aho Arsenal iyoboye urutonde n’aho Manchester United ikaza ku mwanya wa kane.
