RIB yataye muri yombi Uwimana Console wo mu karere ka Ruhango wabyaye umwana agahita amuta mu musarane

Mu gitondo cyo kuri uyu wa Kane tariki ya 26 Ukwakira 2023, Nibwo mu karere ka Ruhango, Urwego rw’Igihugu rw’Ubugenzacyaha, RIB rwataye muri yombi Uwimana Console ukekwaho kubyara umwana akamujugunya mu musarane.

Ibi byabereye mu karere ka Ruhango mu murenge wa Kabagari akagari ka Rwoga mu mudugudu wa Agatare ku wa Gatandatu tariki ya 21 Ukwakira 2023.

Nyirinzu yabwiye BTN ko yaje kureba abapangayi be maze atungurwa no gusanga uwari ufite inda ntayo agifite.

Yagize ati” Naje iwanjye kureba abahatuye uko bamerewe noneho nza gutungurwa no kubona Uwimana Console ntanda agifite”.

Akomeza ati” Nkihagere nakiriwe n’impumuro mbi yaturukaga mu bwiherero. Ni ubwambere byari bibaye, noneho ngize ngo mubaze impamvu bimeze gutyo ambera ibamba nabwo yanze kubyuka. Akibyuka naramubajije ari nako ndeba kunda nsanga ntanda agifite noneho nitabaza abaturage n’ubuyobozi kuko nakekaga ko yihekuye”.

Nyiri ubwite ukekwaho kubyara akihekura, aganira na BTN yavuze ko byabaye ariko yabikoreshejwe na satani kuko uwo muziranenge yari amufiteho umugambi mwiza.

Agira ati” Narabikoze ariko ni shitani. Uyu mwana wanjye narimufiteho gahunda nziza”.

NTIVUGURUZWA Emmanuel, Umunyambanga Nshingwabikorwa w’umurenge wa kabagari yemeje aya makuru.

RIB yahise ita muri yombi uyu wihekuye.

Umurambo wa nyakwigendera wahise ujyanywa mu bitaro bya Gitwe kugirango ukorerwe isuzuma.