Social Mula
Umukinnyi wo hagati Mpuzamahanga ukomoka mu gihugu cya Nigeria, Raphael Osaluwe Olise yasuzuguye umutoza Haringingo Francis Christian n’umuganga Mugemana Charles bari bamugiriye inama yo kuba aretse gutangira imyitozo.
Uyu mukinnyi uhorana imvune nyinshi kuva yagera mu Rwanda, ku Cyumweru tariki 5 Gashyantare ubwo Kiyovu Sports yanganyaga na Rayon Sports ubusa ku busa yasohotse mu kibuga ari kurira ku buryo bukomeye, benshi mu bakunzi b’umupira w’amaguru bakaba bari batangiye gukeka ko ashobora kuzamara hanze y’ikibuga igihe kinini.
Raphael Osaluwe Olise yamaze gusubukura imyitozo ndetse abwira umutoza ko ashaka kuzabanza mu kibuga ku mukino bafitanye na Gasogi United, gusa umutoza Haringingo na muganga Mugemana Charles babanje kumubuza arabatsembera ababwira ko yumva yiteguye gutanga umusaruro ushimishije.
Ku wa Gatandatu tariki 18 Gashyantare 2023, Saa Cyenda n’igice z’amanywa kuri Stade ya Bugesera ikipe ya Gasogi United izaba yakiriye Rayon Sports mu mukino w’umunsi wa 20 wa shampiyona y’Icyiciro cya Mbere umwaka w’imikino wa 2022-2023.
Umuyobozi w’ikipe ya Gasogi United amaze iminsi akubita agatoki ku kandi avuga ko azatsinda Rayon Sports nk’uko yabikoze mu mukino ubanza wabaye tariki 23 Ukuboza 2022 ubwo Gasogi United yatsindaga Rayon Sports igitego kimwe ku busa cyinjijwe na Malipangou Theodore Christian.
Ku rutonde rw’agateganyo rwa shampiyona y’Icyiciro cya Mbere, ikipe ya Gasogi United iri ku mwanya wa gatatu n’amanota 36 aho ikurikirwa na Rayon Sports zinganya amanota zigatandukanywa n’umubare w’ibitego zizigamye.
