Social Mula
Mugisha Fred Robinson wamamaye nka Producer Element Eleéeh mu gutunganya umuziki w’abahanzi b’Abanyarwanda ndetse n’abahanzi Mpuzamahanga yamaze gutandukana na Country Record yerekeza muri yashinzwe na Coach Gael umuyobozi wa 1:55 AM.
Uyu musore ufite igikundiro cyinshi mu myaka ibiri ishize yamaze kwerekeza muri Studio y’umunyemari Coach Gael washinze Label ya 1:55 AM isanzwe ibarizwamo umuhanzi Bruce Melodie.
Coach Gael yamaze kuzuza Studio y’akataraboneka isanzwe ikoreramo Producer witwa Prince Kiiizi wakoze indirimbo zirimo Funga Macho ya Bruce Melodie ikomeje kwigarurira imitima y’abakunzi b’umuziki w’uyu muhanzi.
Biteganyijwe ko muri uku kwezi kwa Mutarama 2023, Coach Gael nabo bafatanya muri 1:55 AM bazayimurika ku mugaragaro.
Producer Element Eleéeh yakoze indirimbo nyinshi zakunzwe zirimo Henzapu, Saa Moya, Abu Dhabi na Katapilla za Bruce Melodie, yanakoze Amashu, inana na Basi Sori za Chriss Eazy ndetse n’izindi nyinshi zitandukanye zirimo iza Kenny Sol, Davis D, Juno Kizigenza na Okkama.
Uyu musore w’imyaka 23 y’amavuko, anafite ubuhanga budasanzwe mu kuririmba kuko mu mwaka ushize yakoze indirimbo yitwa Kashe imaze kurebwa inshuro zirenga miliyoni 4 ku rubuga rwa YouTube.
