Police y’u Rwanda yataye muri yombi abagabo 2 bari bamaze kwiba amafaranga arenga ibihumbi 500Frw

Polisi y’u Rwanda ku bufatanye n’inzego z’ibanze n’abaturage bo mu Karere ka Nyanza, yafatanye abagabo 2 amafaranga ibihumbi 528Frw bicyekwa ko bibye umucuruzi bayakuye mu kabati.

Aba bagabo bafatiwe mu mudugudu wa Masangano, akagari ka Masangano mu murenge wa Busoro, ku wa Kane tariki 7 Nzeri 2023.

Bafashwe biturutse ku makuru yatanzwe n’umucuruzi wari wibwe ayo mafaranga. Uyu mucuruzi yahamagaye police avuga ko hari abantu babiri baje aho acururiza inzoga mu buryo buranguza, bamusaba kumuvunjira inote y’amafaranga ibihumbi bibiri, nyuma bamusaba kubaha inzoga, mu gihe yari agiye kuzibazanira, agarutse asanga bagiye, arebye mu kabati aho yabikaga amafaranga, asanga nta na make asigayemo.

Nyuma yo gutabwa muri yombi, bashyikirijwe Urwego rw’Ubugenzacyaha ‘RIB’ bakaba bafungiwe kuri sitasiyo ya Busoro kugira ngo hakomeze iperereza, amafaranga bafatanywe asubizwa nyirayo.