Perezida wa Rayon Sports yakoze agashya ategera abakinnyi akavagari k’amafaranga na bo bamuha isezerano ryo kuzanyagira Rutsiro FC

Perezida w’ikipe ya Rayon Sports, Uwayezu Jean Fidele yasabye abakinnyi b’iyi kipe kuzanyagira Rutsiro FC ibitego byinshi bagakomeza urugamba rwo guhatanira igikombe cya shampiyona.

Ku wa Gatandatu tariki 25 Gashyantare 2023, ikipe ya Rutsiro FC izakira Rayon Sports mu mukino w’umunsi wa 21 wa shampiyona y’Icyiciro cya Mbere, uyu mukino ukazabera kuri Stade Mpuzamahanga y’i Rubavu.

Ku munsi w’ejo Perezida wa Rayon Sports yasuye abakinnyi abizeza ko nibaramuka batsinze Rutsiro FC buri mukinnyi azahabwa ibihumbi 100 by’Amanyarwanda, abakinnyi na bo bakaba biteguye kwihaniza Rutsiro FC bakayinyagira ibitego byinshi.

Ikipe ya Rayon Sports irahaguruka i Kigali kuri uyu wa Kane tariki 23 Gashyantare 2023, iyi kipe ikaba iri ku mwanya wa kabiri n’amanota 39 mu gihe Rutsiro FC itozwa na Okoko Godfroid iri ku mwanya wa 14 n’amanota 18.