Nyuma yo gupfusha umwana Imana yashumbushije Davido n’umugore we impanga none ibyishimo ni byose

Ibyishimo ni byose mu rugo rw’umuhanzi w’icyamamare muri Nigeria n’umugore we Chioma kuko bamaze kwibaruka impanga z’umuhungu n’umukobwa.

Nyuma y’uko bagize ibyago bagapfusha umwana wabo w’umuhungu witwaga Ifeanyi mu mpanuka yabaye umwaka ushize, Davido n’umugore we Chioma bashumbushijwe impanga ku munsi w’ejo hashize tariki 09 Ukwakira 2023, nk’uko umwe mu nshuti zabo za hafi akaba n’umuvugabutumwa Evang. Gospel Agochukwu yabitangaje mu gitondo cyo kuri uyu wa kabiri.

Iyi nkuru yamenyekanye, nyuma y’aho uyu muvugabutumwa ashyiriye hanze ubutumwa bukubiyemo ibyo yaganiriye na Davido ku ruvuga rwa Facebook.

Ubu butumwa buragira buti: ‘‘Twakiriye impanga ku Isi, umuhungu n’umukobwa. Chioma yabyaye impanga Saa Tatu z’ijoro. Ndishimye cyane.’’

Mu Gushyingo k’umwaka ushize uyu muvugabutumwa, Agochukwu yatangaje ko Imana yamubwiye ko umuhanzi David Adeleke wamamaye nka Davido w’imyaka 30 y’amavuko n’umugore we Chioma Avril Rowland w’imyaka 28 bazakira impanga nyuma y’urupfu rwa Ifeanyi.

Davido na Chioma ntibaragira icyo batangaza kijyanye no kwibaruka ku mbuga nkoranyambaga zabo, ariko ubutumwa bwifuriza abana babo ikaze ku isi bwo bukomeje kwisukiranya ari bwinshi ku mbuga nkoranyambaga zitandukanye.

Aba bombi basezeranye ku wa 4 Ugushyingo 2022 nyuma y’igihe kirekire bakundana, mu gihe indi mihango y’ubukwe yabaye tariki 02 Mutarama 2023.