HARAGIRIMANA Dieudonne
Ku munsi wejo hashize ikipe ya Rayon Sports yakinnye na APR FC mu mukino abafana ba Rayon Sports bishimiye cyane nyuma yaho ikipe yabo ibonye intsinzi bari bakeneye cyane.
Nyuma y’uyu mukino abayobozi barimo Nkurunziza Jean Paul, Namenye Patrick ndetse n’abandi bagaragaye bishimye cyane, abakinnyi baterura Perezida Uwayezu Jean Fidel wabonaga ko ari ibyishimo bisendereye mu karere ka Huye ahabereye uyu mukino ufatwa nk’umukino wa mbere ukunzwe na benshi hano mu Rwanda.
Nyuma y’umukino havuzwe byinshi ndetse n’umuyobozi wa Rayon Sports yagize ubutumwa bukomeye aha abafana b’iyi kipe bashakaga intsinzi mu buryo bugaragarira buri wese. Yavuze ko ashimira abafana ndetse n’abakinnyi uburyo bakomeje kwitanga kandi ko urugendo rugikomeje.
Yagize Ati”Ubutumwa ni uko mbashimira twarafatanyije, ibibazo twagiye tujyamo ntabwo twacitse intege kandi ntabwo twatatanye twashyize hamwe, nkaba mbashimira inkunga ya bo muri uru rugendo turimo.”
Uwayezu Jean Fidel yakomeje asaba abafana ba Rayon Sports ko bakomeza kubatera ingabo mu bitugu kuko ikipe igeze igihe ibakeneye cyane muri uru rugamba rwo gushaka igikombe.
Ati “Ndabashishikariza gukomeza kuba hafi y’ikipe ya bo, turatsinze abakinnyi bakeneye ko tubashimisha kugira ngo bakomeze kwitwara neza, rero ndabasaba ko batera inkunga, inkunga y’ibitekerezo, inkunga y’ikindi cyashoboka ngo dukomeze uru rugendo kandi abakinnyi bacu bishimye. ”
Ikipe ya Rayon Sports irakomeza imyitozo kuri uyu wa kabiri yitegura na none mu buryo bukomeye umukino ifitanye na Gasogi United muri iyi wikendi uzaba ari umukino ukomeye ukurikije uko aya makipe akurikiranye ku rutonde rwa shampiyona uyu mwaka.
Rayon Sports nyuma yo gutsinda uyu mukino yahise inganya amanota n’ikipe ya Gasogi United ndetse na AS Kigali zose zigikurukiranye ku rutonde rwa shampiyona rwagateganyo sezo 2022/2023.
