Murumuna w'umuhanzi Christopher yinjiye muri muzika aho yazanye imbaraga zidasanzwe ashaka gutera ikirenge mu cya mukuru we (inkuru irambuye)

Murumuna w’umuhanzi MUNEZA Christopher ubu wamaze kwinjira muri muzika arahamya ko azanye imbaraga zidasanzwe muri muzika nyarwanda ashaka kugera ikirenge mu cya mukuru we ubu ufatwa nk’umwe mu nkingi za mwamba muri muzika nyarwanda. Uyu musore uzwi ku mazina y’ababyeyi nka INSHUTI Prosper akaba amenyerewe ku mazina y’ubuhanzi nka Kane yaduhamirije ko afite ejo heza muri muzika ye nyuma yo kubona uko indirimbo ze ebyiri yatangiriyeho muzika ye zakiriwe n’abafana be ndetse n’abakunzi b’umuziki nyarwanda muri rusange.

Mu kiganiro kirambuye umuhanzi Kane yagiranye na YEGOB.rw mu kanyamuneza kenshi uyu muhanzi yatubwiye ko yinjiye muri muzika mu mpera z’umwaka wa 2017 ari naho yahise anashyira ahagaragara amajwi y’indirimbo ye ya mbere ariyo SWEETEST LOVE, iyi ndirimbo ikaba yaraje gukurikirwa n’iyitwa NDI MU RUKUNDO yashyize ahagaragara mu ntangiriro z’umwaka wa 2018.

Kane yakomeje atubwira ko arimo kwibanda cyane ku ndirimbo zo mu njyana za RnB na Pop ndetse atubwira ko afite izindi projets nshya ahishiye abafana be ndetse n’abakunzi b’umuziki nyarwanda, izi akaba avuga ko zizabageraho mu gihe cya vuba nubwo agifite imbogamizi zo kuba nta management arabona kugeza ubu.

Mu gusoza, umuhanzi Kane mu magambo ye bwite yabwiye YEGOB.rw ati: “Nkomeje guterwa imbaraga cyane nuko indirimbo zanjye ebyiri natangiriyeho zakiriwe, ibi ni ibikorwa byanjye byatangiye kwivugira. Icyo nasaba abafana banjye ndetse n’abakunzi b’umuziki nyarwanda muri rusange ni ugukomeza kunshyigikira kuko hari byinshi mbahishiye kandi ndimo kubategurira, bizabageraho vuba kandi nizeye neza ko bizabashimisha”.