“Mu by’ukuri iyo ari mu kibuga aratuvunisha” Abakinnyi ba Al Nassr bakomeje kwifatira ku gahanga Cristiano Ronaldo

Umukinnyi wa Al Nassr yifatiye ku gahanga Cristiano Ronaldo avuga ko imikinire ye yaba ibangamira umukino w’ikipe yose muri rusange.
Cristiano Ronaldo usigaye ukinira ikipe ya Al Nassr muri Arabia Saudite akomeje gushinjwa gutuma ikipe ye ikina nabi, ikabona umusaruro bibanje kuyigora.

Luiz Gustavo Dias umukinnyi ukinana na Cristiano Ronaldo muri Al Nassr yatangaje amagambo atungura benshi ubwo yaganiraga n’ikinyamakuri RT Arabic.

Luis Gustavo mu magambo ye yagize ati: ” Mu by’ukuri iyo Cristiano ari mu kibuga aratuvunisha nk’abakinnyi bagenzi be bigatuma abo duhanganye bisanzura. Buri wese aba ashaka kumuha buri mupira ubonetse wese kuko aba yabidusabye!”

Ibi bije nyuma y’uko Cristiano yahushije ibitego byinshi byabazwe mu mukino ikipe ye ya Al Nassr yanganyijemo na Al Fateh 2-2 , nubwo yaje gutsinda igitego cya penaliti ku munota wa 83.

Ku rundi ruhande, Luis Gustavo yenda kurangiza iki kiganiro yagiranaga n’ikinyamakuru RT Arabic yavuze igisa n’uburyarya maze agira ati: “Gusa Cristiano Ronaldo ni we mukinnyi twigiraho byinshi mu buzima bwa buri munsi kuko afite ubuhanga mu kibuga yewe no hanze yacyo”.

Cristiano Ronaldo kuva yagera muri iyi kipe ya Al Nassr muri Mutarama uyu mwaka, amaze gukina imikino itatu bahuyemo na Ettifaq, Al Ittihad ndetse na El Fateh n’undi umwe w’abakinnyi beza bakina muri Al Nassr na Al Hilal bahuyemo na Paris Saint Germain.