HARAGIRIMANA Dieudonne
Miss Uganda 2020 ,witwa Oliver Nakakande yambuwe ikamba nyuma y’uko yari agiye kumara imyaka ibiri yarabuze umusimbura ,ikamba rihita rihabwa undi.
Amakuru avuga ko Miss Oliver atacyambaye iri kamba kubera izindi nshingano yagiyemo zatuma adahuza imirimo yari ashinzwe nka Nyampinga wa Uganda bityo inshingano zisigarana Elizabeth Bagaya.
Elizabeth Bagaya, wabaye igisonga cya mbere mu marushanwa ya Miss Uganda 2019/2020 yatangajwe ko ari Miss w’agateganyo wa Miss Uganda 2020/21. Nk’uko byatangajwe na Brenda Nanyonjo, Umuyobozi mukuru w’irushanwa rya Miss Uganda, Bagaya arahita atangira inshingano nka Miss Uganda.
Yagize ati: “Miss Bagaya Elizabeth, igisonga cya Mbere, ubu niwe Miss Uganda 2020/2021 w’agateganyo, kugira ngo akomeze imirimo y’Ibiro bya Miss Uganda kugeza igihe Miss Uganda mushya yambitswe ikamba mu mpera z’uyu mwaka”.
Ni nyuma y’uko umwaka ushize, amarushanwa ya Miss Uganda atabayeho kubera icyorezo cya korona cyateje imbogamizi ku iteraniro ry’abantu benshi. Nanyonjo yavuze ko Nakakande atabashije gukora imirimo ya Miss Uganda kubera ko yagombaga gusubira ku ishuri kandi akaba adashobora gushyira mu gaciro ibyo yasabwa nka Miss Uganda, ni yo mpamvu bamusimbuje Bagaya.
Nanyonjo yagize ati: “Oliver Nakakande ari kure, akomeza amasomo ye bityo akaba adashobora gukora imirimo y’ibiro bya Miss Uganda, twagombaga guhitamo undi kuko we kaminuza agiyemo nta n’ubwo iri muri Uganda, ni i Dubai. ”
