Kubwayo Mc croix
Miss Jolly Mutesi, Nyampinga w’u Rwanda wa 2016, yatanze imashini 25 zo kudoda ku bakobwa barangije amahugurwa yateguwe n’umuryango Gasore Foundation, washinzwe na Gasore Serge mu Karere ka Bugesera. Iki gikorwa cy’indashyikirwa cyabaye mu rwego rwo gutangira iminsi mikuru isoza umwaka.
Miss Mutesi yavuze ko intego ari ugufasha aba bakobwa kwiteza imbere no kubagarurira icyizere nyuma yo kunyura mu bihe bikomeye byo kubyara imburagihe. Ati: “Nahuye n’aba bana turaganira, mbereka ko ejo habo ari heza, kandi nabageneye imashini buri umwe muri bo.”
Yashimiye ubutwari bwabo bwo guhangana n’ubuzima, kandi abasaba gukomeza gukoresha ayo mahirwe bahawe. Abakobwa bahawe izo mashini bashimiye Miss Mutesi, bamwifuriza umugisha uturuka ku Mana.
Gasore Foundation imaze imyaka 10 ikora ibikorwa by’uburezi, ubuvuzi, n’ubufasha ku miryango itishoboye mu Bugesera, ifasha abakobwa n’ababyeyi batishoboye kwiteza imbere no kugira ubuzima bwiza.
