Meddy afatanyije na bagenzi be bagiye gukorera igikorwa k’intangarugero bamwe mu rubyiruko mu rwego rwo kubateza imbere (inkuru irambuye)

Umuhanzi  Meddy afatanyije n’inshuti ze Ishimwe Charles uba muri Leta zunze ubumwe za America, Umutesi Gentille uba mu Busuwisi na Paul uba mu Rwanda batangije umushinga wo gufasha urubyiruko ndetse n’abakuze bafite inzozi zo kuba ba rwiyemezamirimo ariko ubu badafite ubushobozi bwo kubigeraho.

Uyu mushinga batangije bise “Empower Grow Accelerate (EGA) Connect” uzajya uhuza abashaka kuba ba rwiyemezamirimo badafite ubushobozi n’abashoramari bo mu Burayi na America bashobora gutera inkunga imishinga yabo.

Mu kiganiro n’abanyamakuru kuri uyu wa kane, Meddy yavuze ko ufite umushinga azajya awushyira ku rubuga rwa “www.EGAConnect.com”, hanyuma abashoramari bafite ubushobozi nibawukunda bawutere inkunga.

Meddy yavuze ko ubusanzwe we akunda cyane abantu bakunda gushakisha icyo bakora, bityo ngo ku giti cye nk’uwagize amahirwe yo kubona icyo yafasha urubyiruko rugenzi rwe rw’Abanyarwanda agiye kubikora biciye muri uyu mushinga ahuriyeho n’inshuti ze.

Ngo bizeye ko bazaba ikiraro kizajya gihuza ba rwiyemezamirimo by’umwihariko b’urubyiruko ruba mu Rwanda no hanze yarwo, n’abashoramari bashobora kubafasha kugera ku ndoto zabo. Kandi ngo bizeye ko uyu mushinga uzafasha mu guhangana n’ikibazo cy’ubushomeri.

EGA Connect kandi ngo izajya yerekana mu buryo bwa ‘live’ inama n’ibirori bizajya bihuza abashoramari na ba rwiyemezamirimo mu rwego rwo kubasangiza ubumenyi n’ibitekerezo.

Src: umuseke