Social Mula
Myugariro wo ku ruhande rw’iburyo mu ikipe ya Kiyovu Sports, Serumogo Ally Omar yanze gukora imyitozo muri iyi kipe kubera ko hari amafaranga imurimo.
Uyu mukinnyi usanzwe ari Kapiteni wungirije muri Kiyovu Sports, ubwo yongeraga amasezerano mu mpeshyi y’umwaka ushize ntabwo ubuyobozi bwigeze bumwishyura amafaranga bari bumvikanye.
Mbere y’uko bahura na APR FC ubuyobozi bwa Kiyovu Sports bwahamagaye Serumogo Ally Omar ngo aze afate amafaranga kugira ngo akore imyitozo maze arabyanga ahita anakuraho Telefone, ndetse akaba yanavuye ku rubuga rwa Whatsapp abakinnyi ba Kiyovu Sports bahuriraho.
Kuba Serumogo Ally Omar adakozwa ibyo kugaruka muri Kiyovu Sports mu gihe ibibazo bye bitari byakemuka, umutoza Mateso Jean de Dieu azifashisha umusimbura we witwa Mbonyingabo Regis.
Kiyovu Sports izakira APR FC mu mukino w’umunsi wa 17 wa shampiyona y’Icyiciro cya Mbere umwaka w’imikino wa 2022-2023, uyu mukino ukazabera kuri Stade ya Muhanga ku wa Gatandatu tariki 28 Mutarama 2023.
