Kubwayo Mc croix
Mu gihe Rayon Sports ikomeje kwitwara neza muri shampiyona y’u Rwanda, ikaba imaze imikino irindwi idatsindwa cyangwa ngo inganye, umutoza wa Vision FC, Mbarushimana Abdou, yemeza ko n’ubwo bibasaba imbaraga nyinshi, intego yabo ari ukutazasubira inyuma. Vision FC izakina na Rayon Sports ku mukino w’umunsi wa 11 wa Rwanda Premier League, aho Rayon Sports iyoboye urutonde n’amanota 23, mu gihe Vision FC iri ku mwanya wa 13 n’amanota 8.
Mbarushimana avuga ko Rayon Sports izaba iri ku gitutu kinini kuko ishaka kugumana umwanya wa mbere, bityo Vision FC ikaba ishaka kubyaza amahirwe uyu mwanya igatsinda Rayon sports. Yagize ati: “Twiteguye kuyifatirana tukayitwara amanota atatu.” Yibutsa ko no mu makipe yanyuzemo, n’ubwo gutsinda Rayon Sports bitaba byoroshye, ariko ko hari aho yagiye ayitesha amanota, kandi n’ubu ari cyo gitekerezo afite.
