Kubwayo Mc croix
Lamine Yamal, rutahizamu ukiri muto wa FC Barcelona, akomeje kwandika amateka mu buryo budasanzwe. Uretse guca uduhigo tw’abakinnyi bakiri bato mu ikipe ya mbere ya Barça no mu ikipe y’igihugu ya Espagne, uyu musore w’imyaka 17 ubu yinjiye no mu rwego rw’abahagarariye ibigo bikomeye ku isi. Mu minsi ishize, Yamal yatangajwe nk’umwe mu basore batoranyijwe na kompanyi ya Beats by Dre kuba ambasaderi bayo ku rwego mpuzamahanga.
Yamal avuga ko mbere y’umukino akunda kumva umuziki w’abaraperi nka Morad, 50 Cent, na Eminem, bikamufasha kwinjira mu mwuka wo gukina neza. Ku bwa we, umuziki si ubuzima bw’inyongera ahubwo ni igice cy’imyiteguro ye ya buri munsi. Ati: “Iyo numva injyana nk’iya Eminem cyangwa 50 Cent mbere yo kwinjira mu kibuga, numva mfite imbaraga zidasanzwe zo guhatana.”
Nk’uko BeIn Sports yabitangaje mu nkuru yasohotse tariki ya 7 Nyakanga 2024, Yamal yashimangiye urukundo rwe ku ishuri ry’umupira ryamureze, La Masia, ubwo yahagurukaga agashyikiriza abana barigamo utwuma tw’amatwi (headphones) dusaga 100 twa Beats, hamwe n’ubutumwa bw’ineza bwanditseho bugira buti: “Para que disfrutéis de la música” (bisobanutse ngo “Kugira ngo mwishimire umuziki”). Ni igikorwa cyagaragaje ko nubwo ari kuzamuka mu bikorwa bikomeye, adatererana inkomoko ye.
Iyi mikoranire na Beats by Dre ishyira Yamal mu itsinda ry’ibyamamare byamenyekanye cyane ku isi nka Lionel Messi, Erling Haaland, n’umukinnyi w’umukino wa Basketball LeBron James. Kuba ari kumwe nabo mu gukorana n’uru ruganda, ni ikimenyetso cy’uko impano ye itagibwaho impaka.
Lamine Yamal arimo kubaka izina ritazibagirana, mu mupira w’amaguru no hanze yawo, akaba ari urugero rw’umusore uzi aho yavuye, aho ageze, n’aho agana. Uruhare rwe mu kumenyekanisha umuziki n’inkunga aha abakiri bato, bituma agaragara nk’umukinnyi w’umunyabigwi ufite umutima wa kimuntu, kurusha uko yakwitwa icyamamare gusa.
