“Kwambarira ubucocero aho wambariye inkindi” Umutoza Seninga Innocent ashobora kwisanga yamanuye iyi kipe mu cyiciro cya kabiri

Umutoza Seninga Innocent wa Sunrise FC a ashobora kwisanga yamanuye iyi kipe mu cyiciro cya kabiri ari we wari wayizamuye.

Muri Sunrise FC, ishyamba si ryeru na gato, haratutumba umuriro isaha n’isaha wakwaka, baravuga ngo ntawuhisha inzu ngo ahishe umwotsi, bagerageje kuwupfukirana ariko wishakira inzira ugaragara.

Iyi kipe iheruka intsinzi muri shampiyona tariki ya 21 Ukuboza 2022 ubwo batsindaga AS Kigali 2-1. Imikino yirenze ari 8 itazi ikitwa intsinzi, yanganyije 2 itsindwa 6.

Amakuru Ari kuvugwa ni uko umubano w’abakinnyi n’umutoza mukuru Seninga Innocent wajemo igihu ndetse abakinnyi bamwumva batarenze 3 cyangwa 4.

Uwahaye amakuru ISIMBI ari nayo dukesha iyi nkuru yagize ati “sinakubeshya kandi byigaragaza, ikibazo cyo kirahari, umutoza abakinnyi bameze neza mu myitozo si bo akinisha, icya mbere yashwanye n’abakinnyi bakuru mu ikipe urebye ubu nta muntu ukimuriho, yego ntawabura abe nk’ababiri cyangwa 3 ariko rwose urwambariro rwe rwarapfuye.”