Kubwayo Mc croix
Umuhanzi w’umurundi Kirikou Akili yashyize ahagaragara itangazo asaba imbabazi abafana be nyuma yo kudashyikira igitaramo cya “Ganza Kigali”, cyari cyateguwe na Kivumbi King mu Rwanda.
Mu itangazo ryuzuye icyubahiro, Kirikou Akili yasobanuye ko kutaboneka kwe kwatewe n’ibibazo by’itumanaho hagati ye n’abategura igitaramo. Yagize ati: “Nagerageje kwitegura uko bishoboka kose ndetse nkoherereza itsinda ryanjye ngo rige rikurikirana imyiteguro y’iki gikorwa, ariko ntibyagize umusaruro.”
Kirikou Akili yavuze ko kubura muri iki gitaramo byamubabaje cyane kuko yari afite ubushake bwo guhura n’abafana be no kubashimisha abinyujije mu bihangano bye. Yongeyeho ko yafashe iki cyemezo atabishaka kandi yizeza abafana be ko azakora ibishoboka byose kugira ngo yishyure urukundo bamugaragariza.
Yagize ati: “Nzashyiraho imbaraga zose kugira ngo mbone uko mbonana namwe mu bihe biri imbere. Mbashimira urukundo n’ubwitange mwakomeje kugaragaza.”
Iki gitaramo cya “Ganza Kigali”, cyateguwe na Kivumbi King, cyari cyitezweho guhuza abahanzi n’abafana babo mu buryo bwihariye, ndetse kikaba cyari cyitezweho gusiga inkuru nziza mu muziki w’u Rwanda.
