Kubwayo Mc croix
Mu rwego rwo kongera gukundisha abakunzi babo umuziki wabo wihariye, abahanzi babiri b’ibyamamare bo muri Leta Zunze Ubumwe za Amerika Kendrick Lamar na SZA batangiye urugendo rw’ibitaramo byiswe Grand National Tour. Ibi bitaramo biri kubera mu mijyi itandukanye muri Amerika byagaragaje ko aba bahanzi ari intyoza mu buhanzi, haba mu buryo bw’imyiyereko ndetse no mu mitangire y’ubutumwa butomoye.
Kendrick Lamar, umaze kubaka izina rikomeye mu njyana ya Hip-Hop, yagaragaye ku rubyiniro aturutse mu modoka ya Buick GNX izina rifitanye isano n’album ye nshya. Yatangiye aririmba indirimbo zakunzwe nka DNA., King Kunta, ndetse n’iyo amaze iminsi avugwaho cyane Not Like Us, irimo amagambo benshi bahuza no guhangana kwe na mugenzi we Drake. Imyiyerekano ya Kendrick yaranzwe n’ubwitange budasanzwe, aho amashusho yakinirwaga inyuma y’urubyiniro agaragaza ubuzima bwo muri Compton, agace akomokamo.
SZA, uzwi cyane mu njyana ya R&B, yagaragaye yambaye imyambaro idasanzwe ku buryo bamwe bagereranya isura ye n’ibinyugunyugu cyangwa ibimera. Yaririmbye indirimbo nka Kill Bill, Nobody Gets Me, na Saturn, zituma abafana be badasiba kuririmba na we. Imyiyerekano ye yagaragaragamo ababyinnyi bambaye nk’inyamaswa zo mu ishyamba, bigaragaza ko yitaye cyane ku kurinda ibidukikije no gutanga ubutumwa bwuzuye ubwenge n’imbamutima.
Bombi bafatanyije kuririmba indirimbo All the Stars iyafashije cyane mu mashusho ya filime Black Panther. Iyi ndirimbo bayiririmbye buri wese ari ku mpera z’urubyiniro, bazamurwa n’imashini zabajyanye hejuru, ibintu byashimishije abafana by’ikirenga.
Nk’uko ikinyamakuru Pitchfork cyabitangaje tariki 9 Gicurasi 2025, ibitaramo byabo bifite ishusho idasanzwe, bituma abafana bumva ko bari kureba igikorwa cy’ubuhanzi nyakuri aho kuba igitaramo gisanzwe.
Mu gice kimwe cy’uru rugendo cyabereye i Arlington, Texas, hatangajwe ko igitaramo cyonyine cyinjije miliyoni 11.8 z’amadolari—bikaba bifatwa nk’umusaruro udasanzwe ugereranyije n’ibindi bitaramo bya 2025. Abafana batandukanye bagaragaje ibyishimo ku mbuga nkoranyambaga, bamwe bavuga ko babonye “igitaramo cy’ubuzima bwabo,” abandi bavuga ko SZA na Kendrick bashoboye kwigira ku rwego rwa Beyoncé mu buryo bwo gutegura imyiyereko.
Kendrick Lamar na SZA bifashishije Grand National Tour kwerekana ko ubuhanzi bujyanye n’ibihe bishya bushobora kuba ubukomeye—bushingiye ku myiyerekano, ijwi, ubutumwa, n’ishusho y’ibirori. Nta gushidikanya ko ari bamwe mu bahanzi bagejeje injyana za Hip-Hop na R&B ku rundi rwego, ndetse basiga amateka mu muziki w’Isi.
