Social Mula
Umutoza w’ikipe ya APR FC, Adil Erradi Mohammed yabwiye Manishimwe Djabel ko yasubiye inyuma ku buryo bukomeye bityo ko agomba gukora kugira ngo azongere kugirirwa icyizere cyo kubanza mu kibuga.
Ku gicamunsi cy’ejo ku Cyumweru tariki 2 Ukwakira 2022, shampiyona y’Icyiciro cya Mbere mu Rwanda umwaka w’imikino wa 2022-2023 yari yakomeje aho kuri Stade yo mu Karere ka Ngoma ikipe ya Rwamagana City itozwa na Ruremesha Emmanuel yari yakiriye APR FC.
Ikipe y’Ingabo z’Igihugu yaherukaga gusezererwa mu ijonjora ry’ibanze rya CAF Champions League aho yakuwemo na US Monastir FC yo muri Tunisia, yari yagarukanye ishyaka ryo kubona intsinzi imbere mu gihugu.
Umukino waje kurangira APR FC itsinze Rwamagana City FC ibitego bitatu kuri bibiri, aho mu bakinnyi 11 babanje mu kibuga ku ruhande rw’Ikipe y’Ingabo z’Igihugu ntabwo barimo Kapiteni Manishimwe Djabel.
Hashize igihe Manishimwe Djabel yaratakaje umwanya uhoraho wo kubanza mu kibuga bigendanye n’uko urwego rwe rw’imikinire rwasubiye hasi, bikaba bivugwa ko afite ibibazo hanze y’ikibuga mu muryango we.
Amakuru yizewe Yegob yamenye ni uko umutoza Mohammed Adil Erradi aherutse kugirana ibiganiro na Manishimwe Djabel amubwira ko akwiye kubanza gukemura ibibazo afite mu muryango we kugira ngo yongere gukora imyitozo atuje.
Kuba Manishimwe Djabel atari kubanza mu kibuga igitambaro cy’ubukapiteni cyambarwa na Kapiteni wungirije ari we Buregeya Prince ukinana na Niyigena Clement mu mutima w’ubwugarizi.
Ikipe ya APR FC imaze gukina imikino ibiri ya shampiyona harimo uwo yatsinzemo Musanze FC ibitego bibiri kuri kimwe n’uwo yatsinzemo Rwamagana City, ikaba ifite ibirarane bibiri aho izahura na Bugesera FC na Police FC.
Iyi kipe y’Ingabo z’Igihugu izagaruka mu kibuga ku munsi wa gatanu wa shampiyona icakirana na Marine FC tariki 12 Ukwakira 2022 kuri Stade ya Kigali i Nyamirambo, uyu mukino ukaba uzatangira Saa Kumi n’Ebyiri n’igice z’umugoroba.
