Ishyamba si ryeru mu ikipe ya Kiyovu Sports

Ishyamba si ryeru muri Kiyovu Sports aho umutoza Alain-André Landeut ukomoka muri Repubulika Iharanira Demokarasi ya Congo yatangiye kugirana ibibazo na bamwe mu bakinnyi b’iyi kipe.

Benshi mu bakurikira umupira w’amaguru batunguwe no kubona Kiyovu Sports igiye gukina na Sunrise FC idafite bamwe mu bakinnyi b’inkingi za mwamba nka Bigirimana Abedi na Coutinho ni mu gihe Nshimirimana Ismail Pitchou we yari yamubanje ku ntebe y’abasimbura muri uyu mukino yatsinzwe 2-1.

Agaruka kuri Abedi na Coutinho impamvu batakinnye, yavuze ko bafite ibibazo by’imishahara barimo bishyuza bityo ko yabaye abaretse ngo babanze bishyuze.

Ati “ntabwo nakinnye mfite Coutinho na Abedi kuko ntabwo bakoze, ntabwo bakoze kuko barimo bishyuza imishahara ya bo, nyuma naje kubwirwa ko nta mukinnyi wa Kiyovu ufitiwe ikirarane, dutsinzwe 2-1 ariko tugomba gukomeza gukora, tugakora imyitozo ariko umukinnyi utaritoje ntabwo nzigera mukinisha.”

Ibi bikaba bifitanye isano n’igihe bamwe mu bakinnyi ba Kiyovu Sports bangaga gukora imyitozo hagati mu cyumweru gishize kuko hari bamwe muri bo bafitiwe amafaranga batarishyurwa.

Si ibi gusa kuko amakuru ISIMBI yamenye ni uko benshi mu bakinnyi batishimiye uburyo uyu mutoza abafashemo kuko hari bamwe batumva impamvu atabakinisha kandi nyamara mu myitozo baba bahagaze neza.

Ikindi kibabangamira ni uburyo uyu mutoza aba ashaka kwinjira mu masezerano buri mukinnyi yagiranye n’ikipe ngo ayamenye, bayamuhe ayasome kandi amasezerano aba ari hagati y’ikipe n’umukinnyi, akenshi iyo umukinnyi ayamwimye bahita bagirana ikibazo.

Ngo ibyo akora byose na we aba abizi ko hari ibitameze neza gusa na none ntatewe ubwoba bwo kuba yakwirukanwa kuko ngo Kiyovu Sports yazamwishyura amafaranga menshi.

Ibi byose bikaba bije bikurikirana na Mvukiyehe Juvenal, perezida wa Kiyovu Sports wari weguye kuri uyu mwanya mu cyumweru gishize ariko akazi kwisubiraho.