HARAGIRIMANA Dieudonne
Ikipe y’Intare FC yagombaga gukina n’ikipe ya Rayon Sports umukino ugasubikwa, yabwiwe ko igomba gukina uyu mukino nyuma yo kwandikira FERWAFA isaba gutera mpaga Rayon Sports.
Hashize iminsi itari myinshi ikipe y’Intare FC yandikiye FERWAFA iyimenyesha ko umwanzuro yafashe wo kongera ikemerera Rayon Sports kugaruka mu gikombe cy’amahoro batawemera kubera ko iyi kipe yari yikuye muri iri rushanwa Intare FC ikemeza ko umukino wayo na Rayon Sports warangiye bateye mpaga y’ibitego 3-0.
Ku munsi w’ejo hashize ishyirahamwe ry’umupira w’amaguru hano mu Rwanda FERWAFA yakoze inama yiga kuri iki kibazo cy’Intare FC na Rayon Sports bemeza ko uyu mukino ugomba kuba ahubwo ikipe ya Rayon Sports ndetse n’Intare FC yasabye gukomeza mu kindi cyiciro idakinnye uyu mukino wo kwishyura zigomba kwitegura ariko i tariki uyu mukino uzaberaho ikazatangazwa mu minsi iri imbere.
Umukino ubanza ikipe ya Rayon Sports yatsinze Intare FC ibitego 2-1 mu mukino nawo utaravuzweho rumwe kubera ko ikipe y’Intare FC yatashye ivuga ko yibwe igitego cyahesheje intsinzi ikipe ya Rayon Sports.
