Social Mula
Ikipe ya Rayon Sports ikomeje kuvugwamo umwuka mwiza nyuma yo gutsinda mucyeba APR FC igitego kimwe ku busa ku munsi wa 19 wa shampiyona y’Icyiciro cya Mbere umwaka w’imikino wa 2022-2023.
Muri iyi kipe ikunzwe n’Abanyarwanda benshi harimo amakuru meza mbere y’uko bacakirana na Gasogi United ku wa Gatandatu tariki 18 Gashyantare 2023 mu mukino uzabera kuri Stade y’i Bugesera.
Inkuru ya mbere nziza muri Gikundiro ni uko Raphael Osalue yatangiye imyitozo ku wa Kane w’icyumweru gishize tariki ya 9 Gashyantare 2023 ndetse amakuru avuga ko ashobora kuzagaragara ku mukino w’umunsi wa 21 bazasuramo Rutsiro FC kuri Stade Mpuzamahanga y’i Rubavu.
Uretse Raphael Osaluwe Olise wasubukuye imyitozo na Ndizeye Samuel usanzwe ari Visi Kapiteni yatangiye imyitozo yoroheje nyuma yo kubagwa imvune y’urutugu, nta gihindutse mu kwezi gutaha kwa Werurwe azaba yaragarutse mu kibuga.
Andi makuru meza ari muri Rayon Sports, ni uko ubuyobozi bwamaze guha agahimbazamusyi kangana n’ibihumbi 400 by’Amanyarwanda abakinnyi bakoreshejwe ku mukino baheruka gutsindamo APR FC, ibi nabyo akaba ari bimwe mu biraza kongera imbaraga mbere yo guhura na Gasogi United.
Muri iyi kipe kandi abakinnyi n’abatoza bunze ubumwe bitandukanye n’uko bari bameze mu minsi ishize ubwo umusaruro mwiza wari utangiye kubura, bamwe mu bakinnyi bakaba bari baratangiye kurebana ay’ingwe n’abatoza gusa ubu nta mwuka mubi uri hagati y’impande zombi.
Ikipe ya Rayon Sports iri ku mwanya wa kane n’amanota 36 aho iyanganya na Gasogi United na AS Kigali zigatandukanywa n’umubare w’ibitego zizigamye, mu gihe zirushwa na APR FC ya mbere inota rimwe gusa.
