Imana ikomeje kurara mu Rwagasabo! Senegal itabaye Amavubi

Ikipe y’igihugu ya Senegal yifatiye Ikipe y’igihugu ya Mozambique iyinyagira ibitego bitanu kuri kimwe, bituma umutima w’abakunzi b’ikipe y’igihugu Amavubi usubira mu gitereko.

Muri iri joro ryo kuwa Gatanu nibwo ikipe y’igihugu ya Senegal yari yakiriye Mozambique mu mukino w’umunsi wa 3 mu itsinda L mu gushaka itike y’Igikombe cy’Afurika cya 2024 , maze Senegal ibifashijwemo n’abasore bayo banyagira Mozambique umuba w’ibitego bitanu kuri kimwe.

Ibitego bya Senegal byatsinzwe na Youssouf Sabaly ku munota wa 9, Sadio Mane ku munota wa 15, Illman Ndiaye ku munota wa 32, Boulaye Dia ku munota wa 39 na Mouhamadou Diallo watsinze agashinguracumu ku munota wa 89. Mu gihe impozamarira ya Mozambique yatsinzwe na Gildo Vilanculos ku munota wa 48.

Gutsinda kwa Senegal byatumye ikipe y’igihugu Amavubi akomeza kugura ikizere kuko naeamuka atsindiye Benin i Kigali bizatuma afata umwanya wa kabiri mu gihe Senegal yakongera igatsinda Mozambique muri Afurika y’Epfo.

Uko urutonde rw’agateganyo ruhagaze mu itsinda L
1. SENEGAL 9 Pts
2. Mozambique 4 Pts
3. Rwanda 2 Pts
4. Benin 1 Pt