Ikipe y’Abakinnyi 11 bahenze ku Isi kurusha abandi mu mupira w’Amaguru igitangaje ntiharimo ukina muri Serie A.

Iyi ni ikipe y’abakinnyi 11 ba mbere bahenze ku isi kugeza aka kanya kuri buri mwanya. Muri rusange iyi kipe ihagaze agaciro ka miliyari €1.27 gusa igitangaje ntabwo igaragaraho umukinnyi numwe wo muri shampiyona y’Ubutaliyani Serie A kandi iri muri shampiyona 5 zikomeye ku isi.

Iyi kipe irimo abakinnyi 3 ba Real Madrid yo muri Espagne, abakinnyi 3 ba Manchester City yo mu Bwongereza, abakinnyi 3 ba Arsenal n’umukinnyi 1 wa Bayern Munich yo mu Budage na Paris Saint Germain yo mu Bufaransa.

Iyi kipe yakina mu buryo (Formation) bwa 3-2-3-2, ikaba yiganjemo abakinnyi bakiri bato.

Ikipe y’abakinnyi 11 bahenze ku isi irimo:

UMUZAMU: Thibaut Courtois

Uyu ni umuzamu usanzwe ukinira Real Madrid w’imyaka 31 y’amavuko ukomoka mu Bubiligi. Uyu muzamu akaba ahagaze ku gaciro ka miliyoni €45.

MYUGARIRO: William Saliba

Uyu ni myugariro w’umufaransa w’imyaka 22 usanzwe ukinira ikipe ya Arsenal yo mu bwami bw’Ubwongereza. Uyu myugariro akaba ahagaze agaciro ka miliyoni €70.

MYUGARIRO: Ruben Dias

Uyu ni myugariro w’imyaka 26 y’amavuko ukinira ikipe ya Manchester City yo mu Bwongereza akaba akomoka muri Portugal. Uyu myugariro akaba ahagaze ku gaciro ka miliyoni €80.

MYUGARIRO: Josko Gvardiol

Uyu ni myugariro w’imyaka 21 y’amavuko uherutse kujya mu ikipe ya Manchester City avuye muri RB Leipzig yo mu Budage. Uyu myugariro ukomoka muri Croatia akaba ahagaze ku gaciro ka miliyoni €80.

MU KIBUGA HAGATI: Declan Rice

Rice w’imyaka 24 y’amavuko akaba ari umwongereza ukinira ikipe ya Arsenal yo mu Bwongereza aho yayigezemo avuye muri West Ham United. Uyu mukinnyi wo kibuga hagati akaba ahagaze ku gaciro ka miliyoni €100 ndetse akaba ari mu bari gufasha ikipe ya Arsenal kwitwara neza muri shampiyona y’Ubwongereza Premier League.

MU KIBUGA HAGATI: Jude Bellingham

Uyu ni umukinnyi wo mu kibuga hagati usanzwe ukinira ikipe ya Real Madrid yo muri Espagne, iyi kipe akaba yarayigezemo mu mpeshyi y’uyu mwaka avuye muri Borussia Dortmund. Bellingham mu mikino 10 ye ya mbere muri Real Madrid akaba amaze kuyitsindira ibitego 10. Uyu musore wo mu kibuga hagati akaba ahagaze ku gaciro ka miliyoni €150.

MU KIBUGA: Jamal Musiala

Uyu ni umukinnyi wo mu kibuga hagati w’imyaka 20 y’amavuko ukinira ikipe ya Bayern Munich y’iwabo mu Budage. Muri iyi kipe, uyu mukinnyi akaba yajya akina mu kibuga hagati gusa asatira izamu abazwi nka attacking midfielder mu rurimi rw’icyongereza. Uyu musore akaba ahagaze ku gaciro ka miliyoni €110.

RUTAHIZAMU WO KU RUHANDE RW’IBUMOSO: Bukayo Saka

Uyu ni rutahizamu uca ku ruhande usanzwe ukinira ikipe y’Arsenal mu Bwongereza, akaba afite imyaka 22 y’amavuko. Uyu musore w’umwongereza akaba ahagaze miliyoni €120, muri iyi kipe akaba yakina yataka izamu ariko aciye ku ruhande rw’ibumoso.

RUTAHIZAMU WO KU RUHANDE RW’IBURYO: Vinicius Junior

Uyu ni rutahizamu ukomoka muri Brazil w’imyaka 23 y’amavuko usanzwe ukinira ikipe ya Real Madrid yo muri Espagne. Uyu mukinnyi akaba ahagaze agera kuri miliyoni €150 ku isoko ry’igura n’igurisha. Muri iyi kipe akaba yajya akina ku ruhande rw’iburyo asatira izamu.

RUTAHIZAMU: Erling Braut Haaland

Uyu ni rutahizamu w’imyaka 23 y’amavuko ukinira ikipe ya Manchester City yo mu gihugu cy’Ubwongereza. Mu mwaka ushize w’imikino akaba yarahembwe nk’uwatsinze ibitego byinshi muri shampiyona y’ubwami bw’Ubwongereza Premier League. Haaland ukomoka muri Norway akaba ahagaze ku gaciro ka miliyoni €180.

RUTAHIZAMU: Kylian Mbappe

Mbappe ni rutahizamu wundi waba uri muri iyi kipe aho ku isoko ry’igura n’igurisha ahagaze agera kuri miliyoni €180. Uyu rutahizamu w’umufaransa w’imyaka 24 asanzwe akinira ikipe ya Paris Saint Germain y’iwabo ikina mu kiciro cya mbere Ligue 1.

Iyi niyo kipe y’abakinnyi 11 bahenze ku isi kuri buri mwanya kuri ubu. Iyi kipe ikunze guhindagurika cyane ko iterwa n’uburyo abakinnyi baba bari kwitwara mu makipe yabo bikanajyana n’imyaka baba bafite.