HARAGIRIMANA Dieudonne
Ikipe ya Rayon Sports yamaze kumva ko igikombe cya Shampiyona yamaze kugitakaza, igiye kongera gukina umukino w’umunsi wa 26 idafite abakinnyi 2 yagenderagaho cyane muri iyi minsi.
Ku munsi wejo kuwa gatandatu tariki ya 15 mata 2023, Shampiyona y’icyiciro cya mbere hano mu Rwanda irasubukurwa hakinwa umukino w’umunsi wa 26, ikipe zirimo Police FC, APR FC, Rayon Sports ndetse n’izindi zigomba kwikiranura.
Muri aya makipe akomeye ahanganiye igikombe cya Shampiyona uyu mwaka, ikipe ya Rayon Sports niyo ubona ko ifite ibibazo byinshi by’imvune bitewe ni uko abakinnyi barimo Hakizimana Adolphe, Mitima Issac ndetse na Ndizeye Samuel bashobora kutagaragara ku mukino ikipe ya Rayon Sports izakinamo na Bugesera FC.
Aba bakinnyi harimo 2 aribo Adolphe ndetse na Mitima bari bamaze igihe bakinira ikipe ya Rayon Sports ndetse Kandi ukabona mu ntsinzi iyi kipe igenda ibona bari mu bakinnyi bayifasha cyane, ibi bishobora kutayorohera kubera Izi mvune.
Ntabwo ikipe ya Rayon Sports ibi bihe aribwo ibigize gusa muri uyu mwaka w’imikino, dore ko yigeze no kwicara ku mwanya wa mbere ariko kubera ibibazo by’imvune itangira kugenda isubira inyuma APR FC na Kiyovu Sports zihita ziyijya imbere kugeza ubu.
