Ikipe ya PSG ikinamo Lionel Messi igiye kwikura kuri sitade yakiniragaho yongere ibunze akarago

Ikipe ya Paris Saint Germain iri mu nzira zo kureka gukinira kuri ‘Parc des Princes’ nyuma y’uko ubuyobozi bw’Umujyi wa Paris bwanze kuyibugurisha.

Nkuko umuyobozi w’Umujyi wa Paris, Anne Hidalgo abitangaza ngo ‘Parc des Princes’ntabwo igurishwa, ibintu byatumye Paris Saint Germain yashakaga kugura iyi stade isubiza amerwe mu isaho.

Nkuko France24 ibitangaza ngo nyuma y’uko Meya Hidalgo atangaje ibi, umuvugizi wa PSG yavuze ko icyemezo cy’uyu mugore gisa no kubirukana kuri iyi stade.

PSG yatangiye gukinira no kwakirira imikino kuri Parc Des Princes mu 1974, nyuma y’imyaka 77 iyi stade itashywe. Iyi kipe yagiye igaragaza ko ishaka kwegukana iyi stade ifite ubushobozi bwo kwakira abantu 48.000 ariko ubuyobozi bw’Umujyi wa Paris bukayibera ibamba.