Social Mula
Ikipe ya RSC Anderlecht Futures ibarizwa muri shampiyona y’Icyiciro cya Kabiri mu gihugu cy’u Bubiligi yamaze kwandikira APR FC isaba ko Ruboneka Jean Bosco yajya kuyikoramo igeragezwa.
Mu ntangiriro z’ukwezi gushize ni bwo ikipe ya RSC Anderlecht Futures yanditse ibaruwa iyoherereza ubuyobozi bw’ikipe y’Ingabo z’Igihugu igaragaza ko yifuza umukinnyi wo hagati Ruboneka Jean Bosco umaze igihe yitwara neza.
Amakuru yizewe twakuye hafi y’inshuti za Ruboneka Jean Bosco ni uko hari andi makipe atandukanye yo ku Mugabane w’i Burayi yagiye yifuza ko yajya kuyakoramo igeragezwa ariko akaba abona bitapfa gukunda ko agenda uyu mwaka w’imikino utari warangira.
Mu kwezi wa Kanama Mupenzi Emmanuel bakunze kwita Eto’o yari yerekeje mu gihugu cy’u Bubiligi, uyu mugabo ushizwe igura n’igurisha ry’abakinnyi muri APR FC akaba yari yagiye kuganira n’amakipe menshi yifuza bamwe mu bakinnyi b’iyi kipe.
Mu bakinnyi ba APR FC bifuzwa n’amakipe yo ku Mugabane w’i Burayi by’umwihariko mu Cyiciro cya Kabiri mu Bubiligi barimo Ruboneka Jean Bosco, Omborenga Fitina, Mugisha Bonheur na rutahizamu Mugunga Yves.
Kugeza ubu ikipe ya APR FC ntabwo yari yasubiza RSC Anderlecht Futures niba izarekura Ruboneka Jean Bosco akazajya kuyikoramo igeragezwa muri Mutarama 2023 kuko ni umwe mu bakinnyi igenderaho ku buryo kuba yamurekura agiye gukora igeragezwa biri kure nk’ukwezi.
Uyu mukinnyi afatiye runini Ikipe y’Ingabo z’Igihugu hagati mu kibuga we na mugenzi we Mugisha Bonheur bakunze kwita Casemiro, ubufatanye bwabo bukaba bukomeje gutanga umusaruro ushimishije kuva mu mwaka ushize w’imikino.
Ruboneka Jean Bosco ni umwe mu bakinnyi ngenderwaho mu Ikipe y’Ingabo z’Igihugu aho ayifatiye runini hagati mu kibuga, yayigezemo mu mpeshyi ya 2020 avuye mu ikipe ya AS Muhanga.
Uyu musore na bagenzi be bakinana muri APR FC bakomeje imyitozo aho bari kwitegura umukino w’ikirarane bazahuramo na Bugesera FC tariki 7 Ukwakira 2022, ni nako tariki 12 Ukwakira bazacakirana na Marine FC ku mukino w’umunsi wa gatanu wa shampiyona y’Icyiciro cya Mbere.
