THIERRY Mugiraneza
Mu ikipe ya Arsenal haravugwamo inkuru itari nziza y’uko Thomas Partey yaba yaragiriye ikibazo cy’imvune mu ikipe y’igihugu ya Ghana.
Kuva mu cyumweru cyashize abakinnyi batandukanye bagiye gukina imikino y’amakipe y’ibihugu bitewe n’amarushanwa ibyo bihugu biri gukina.
Thomas Partey, umukinnyi ukina mu kibuga hagati mu ikipe ya Arsenal yari yagiye gukinira ikipe y’igihugu cye ya Ghana.
Ghana yarifite imikino ibiri na Angola mu gushaka itike y’igikombe cy’Afurika. Aho niho Thomas Partey yagiriye ikibazo cy’imvune nk’uko Chris Houghton utoza Ghana yemeje ko Partey yagiriye imvune ku myitozo yo ku cyumweru arinabyo byatumye adakina umukino Ghana yaraye inganyije na Angola igitego kimwe kuri kimwe.
Amakuru dukesha ikinyamakuru Goal.Com aravuga ko Partey yahise agaruka i London igitaraganya kugira ngo yitabweho n’abaganga ngo azifashihswe ku mukino Arsenal izakira Leeds United mu mpera z’icyumweru.
Arsenal mu gihe Thomas Partey yaba adahari bashobora gukoresha Jorginho nubwo imibare igaragaza ko Arsenal iba ifite intsinzi ku kigero cya 65% iyo Partey yabanje mu kibuga na 50% iyo atabanjemo. Kugeza ubu Arsenal niyo iyoboye urutonde rw’agateganyo rwa shampiyona n’amanota 69 ikurikiwe na Manchester City n’amanota 61.
