Ibyo wamenya ku baherwe bamaze gutanga ubusabe bwabo mu kwigurira Manchester United

Abaherwe n’abanyamafaranga batandukanye bamaze gutanga ubusabe bwabo mu kugura ikipe ya Manchester United.

Ikipe ya Manchester United isanzwe ikina shampiyona y’ikiciro cya mbere mu Bwongereza ikagira n’andi makipe atandukanye mu byiciro birimo abagore ndetse n’abana.
Manchester United ifitwe n’abaherwe bakomoka mu muryango witwa ‘ The Glazers Family’ ariko aba baherwe bakaba baramaze gutangaza ko bashakakugurisha iyi kipe.

Glazers Family baguze Manchester United mu mwaka wa 2005 bayigura akabakaba miliyoni 790 z’Amapawundi babinyujije muri sosiyete yitwa Red Football Ltd. Aba baherwe bafashije Manchester United kugura abakinnyi bakomeye ndetse iyi kipe itwara ibikombe byose bishoboka, ariko ubwo iyi kipe yatangiraga kunanirwa gutwara ibikombe nk’uko byahoze abafana bayo batangiye gushinja abo baherwe gushora ikipe mu myenda.

Mu kwezi kwa Cumi na kumwe umwaka ushize nibwo ‘ Family Glazers’ batangaje ko bashaka amavugurura arimo no kugurisha iyi kipe.
Ku munsi wo kuwa Gatanu nibwo abaherwe batandukanye batanze ubusabe bwabo mu kwigurira iyo kipe , bamwe mu baherwe batanze ubusabe bwabo harimo umuherwe wo muri Qatar ndetse n’undi wo mu Bwongereza.
1.Sheikh Jassim Bin Hamad Al Thani.

Sheikh Jassim Bin Hamad Al Thani ni umuherwe ukomoka muri Qatar akaba ari umuyobozi wa Banki ya Kisilamu muri Qatar( Qatar Islamic Bank) , akaba afite imyaka 44 y’amavuko, Sheikh Jassim akaba ngo yarafannye Manchester United kuva mu 1992.
Mu itangazo Sheikh Jassim yasohoye yavuze ko yifuza kugura Manchester United ijana ku ijana , ajazayigira ikipe ikomeye nk’uko yahoze ndetse mu migambi ye harimo no kuzavugurura ikibuga cy’imyitozo cya Manchester United ndetse na sitade yayo Old Trafford.
2.Sir Jim Ratcliffe.

Sir Jim Ratcliffe ni umuherwe w’umwongereza w’imyaka 70 y’amavuko. Sir Jim Ratcliffe ni umuherwe ufite sosiyete ya INEOS Group ndetse akaba afite ibindi bikorwa muri siporo harimo ikipe y’umukino w’amagare ya Ineos, ikipe y’umupira w’amaguru ya Nice mu Bufaransa ndetse n’imigabane mu ikipe ya Mercedes ikina umukino wo gusiganwa mu modoka.