Epaphrodite Nsengimana
Mu karere ka Kicukiro mu murenge wa Gikondo haravugwa inkuru y’amayobera, inzoka yatwitse inzu y’ubucuruzi maze ibyarimo byose birashya birakongoka.
Ibi byabereye mu mudugudu wa Kabuye ya Mbere aho umuryango umwe w’inzu uri hagati mu nzu y’imiryango 5 ucururizwamo n’umugabo uzwi nka Papa Selline, niwo wahiye urakongoka ariko indi miryango byari bifatanye ntihagira n’umwotsi winjiramo.
Abaturage bo muri ako gace batangirije BTN Tv dukesha aya makuru ko mbere y’uko iyi nzu ishya hari inzoka yari yabanje kuzenguruka muri ako gace maze iza kwinjira muri iyo nzu, igezemo yikaragira ku munzani asanzwe apimisha ibicuruzwabye maze ijya muri Kesi ari naho umuriro waturutse.
Aba baturage bakomeza bavuga ko amagini yakoreye yacunze umutungo nabi none wakongotse, abandi bati “Agahuru ka Satani kakongotse.”
Itangazamakuru ryashatse guhamagara nyiri iri duka ryahiye kugira ngo rimubaze niba koko iyi nzoka ariyo yateye iyi nkongi maze telefone ye ntiyacamo.
