Kubwayo Mc croix
Mu mukino wa Champions League wabaye kuri uyu wa Gatatu tariki ya 7 Ugushyingo 2024, ikipe ya Inter Milan yatsinze Arsenal 1-0 kuri San Siro. Denzel Dumfries yashoboraga gufungura amazamu ku munota wa 4, ariko ishoti rye rikubita igiti cy’izamu. Arsenal nayo yakomeje gushakisha uburyo bw’igitego ariko abakinnyi nka Bukayo Saka ntibashobora kuboneza mu izamu.
Inter Milan yongeye kurusha Arsenal, maze ku munota wa 38, ihabwa penaliti ku ikosa rya Mikel Merino wakinishije intoki mu rubuga rw’amahina. Hakan Calhanoglu yayiteye neza yinjira mu izamu, Inter bajya kuruhuka bafite igitego 1-0.
Arsenal yagerageje kwishyura mu gice cya kabiri ikoresheje abakinnyi bayo nka Gabriel Jesus, Gabriel Martinelli, na Bukayo Saka, ariko umunyezamu Yann Sommer akomeza kuba ibamba.
Mu yindi mikino, Club Brugge yatsinze Aston Villa 1-0, Shakhtar Donetsk itsinda Young Boys 2-0, Bayern Munich itsinda Benfica 1-0, naho Atletico Madrid itsinda PSG 2-1. Liverpool ikomeje kuyobora Champions League 2024/25 n’amanota 12, ikurikirwa na Sporting CP n’amanota 10.
