HARAGIRIMANA Dieudonne
Mu ikipe ikomeye hano mu Rwanda hatangiye kuzamo urunturuntu hagati y’abakinnyi, abatoza n’ubuyobozi.
Guhera ku munsi wo kuwa gatanu w’icyumweru gishize, hakomezaga imikino y’umunsi wa 23 ubwo ikipe ya Gasogi United ndetse na Rwamagana City zanganyaga ibitego 2-2 mu mukino utaravuzweho rumwe bitewe n’imyitwarire y’abasifuzi. Ntabwo uyu mukino ari wo wabaye gusa ahubwo ikipe ya Rutsiro FC nayo yatsinze ikipe ya Espoir FC ibitego 4-0.
Uyu munsi wa Shampiyona waje gukomeza no ku munsi wo kuwa gatandatu, ikipe zirimo Police FC, APR FC zose zarakinnye ariko uwagarutsweho cyane ni ugutsindwa kwa Police FC n’ikipe ya Bugesera FC ibitego 2-1. Uyu mukino ikipe ya Police FC yitwaye neza ariko ikipe ya Bugesera FC iza gutahana amanota 3.
Nyuma y’uyu mukino havuzwe byinshi bitewe ni uko benshi bashinjaga Mashami Vincent utoza Police FC ko ntabushobozi afite ariko bitewe ni uko iyi kipe yitwaye benshi bamukuyeho uru rubwa ahubwo bemeza ko abakinnyi afite ari bo bamutenguha kuko ubona imitoreze ye aba ari myiza ariko abakinnyi bataha izamu kubona amahirwe ngo bayabyaze umusaruro bikabananira ikipe igatakaza amanota mu buryo butumvikana.
Amakuru YEGOB twamenye ni uko muri iyi kipe nubwo yari imaze iminsi ititwara nabi, hatangiye kuzamo kutumvikana hagati y’abakinnyi, abatoza ndetse n’ubuyobozi bw’iyi kipe. Abayobozi barabaza umutoza impamvu atitwara neza kandi batanze byose nawe akemeza ko abakinnyi ari bo bamutenguha ngo kuko igisabwa cyose aba yagikoze nk’umutoza.
Police FC uyu mukino iwutakaje nyuma yo gukomeza mu gikombe cy’amahoro nabwo ariko yabanje gutsindwa na Sunrise FC igitego kimwe ku busa ariko kubera ibitego 2 iyi kipe ya Police FC yari yatsindiye hanze bihita bituma ikomeza muri 1/4 cyirangiza mu gikombe cy’amahoro.
