HARAGIRIMANA Dieudonne
Miss Nshuti Divine Muheto wegukanye ikamba rya Miss Rwanda 2022 yahawe imodoka ya Hyundai Venue 2022 nk’igihembo nyamukuru akaba ari imodoka yatanzwe na Hyundai Rwanda.
Kugeza kuri uyu munsi, iyi modoka ya Hyundai Venue 2022 ntabwo Miss Muheto arayihabwa.
Amakuru dukesha Radio/Tv10 avuga ko Umuyobozi mukuru wa Hyundai Rwanda, Mugabo Olivier, yabwiye itangazamakuru ko iyi modoka itaragera mu Rwanda ndetse ko ibyo gutinda kuhagera byari bizwi n’abategura iri rushanwa rya Miss Rwanda.
Yavuze ko icyatumye itinda kuza ari imirimo yo gusana icyambu cya Dar es Salaam aho yatumye bimwe mu bicuruzwa binyura kuri iki cyambu bitinda mu nzira.
Ati « bashinzwe gutegura Miss Rwanda bari babizi usibye ko na yo [Imodoka] yabashije gupakururwa noneho ».
Olivier avuga ko iki cyumweru kizasiga iyi modoka yarageze mu Rwanda ariko ko ibyo kuzahabwa Miss Rwanda 2022 byo biri mu maboko y’abategura iri rushanwa.
Iyi modoka ya Hyundai Venue 2022 ifite agaciro k’amafaranga asaga ibihumbi 20 y’amadolari y’Amerika (Asaga miliyoni 20 z’amafaranga y’U Rwanda).
